പ്രസിഡന്റ് തെരഞ്ഞെടുപ്പിനൊരുങ്ങുന്ന ശ്രീലങ്ക
ശ്രീലങ്കയിലെ കാലാവസ്ഥപോലെ അനിശ്ചിതമാണ് ഇപ്പോള് അവിടത്തെ രാഷ്ട്രീയവും. നവംബര് 16 ന് നടക്കാനിരിക്കുന്ന പ്രസിഡന്റ് തെരഞ്ഞെടുപ്പിലേക്കുള്ള ഒരുക്കത്തിലാണ് ശ്രീലങ്ക. എന്നാല് രാഷ്ട്രീയ പ്രചാരണങ്ങള് വേണ്ടരീതിയില് പുരോഗമിച്ചിട്ടില്ല എന്നുവേണം പറയാന്. രാജ്യത്തെ ഏറ്റവും ശക്തമായ തെരഞ്ഞടുപ്പ് പ്രക്രിയയില് ഇങ്ങനെ ഒരു അസാധാരണത്വം മറ്റൊരിടത്തും കണ്ടെന്നുവരില്ല. പക്ഷേ അതില് അത്ഭുതപ്പെടാന് ഒന്നുമില്ല. ഈസ്റ്റര് ദിനത്തില് ഉണ്ടായ സ്ഫോടന പരമ്പരകളില് നിന്ന് രാജ്യം ഇനിയും കരകയറിയിട്ടില്ല എന്നതാണ് യാഥാര്ത്ഥ്യം. മുന് ശ്രീലങ്കന് പ്രസിഡന്റ് മഹീന്ദ രാജപക്സേയുടെ സഹോദരനും മുന് പ്രതിരോധ സെക്രട്ടറിയുമായ ഗോടാബേയ രാജപക്സേ ഈ വര്ഷം ആദ്യം തന്നെ തന്റെ അമേരിക്കന് പൗരത്വം ഉപേക്ഷിക്കുന്നതായി പ്രഖ്യാപിച്ചിരുന്നു. ശ്രീലങ്കന് തെരഞ്ഞെടുപ്പില് മത്സരിക്കുന്നതിന്റെ ഭാഗമായിട്ടായിരുന്നു ഈ പ്രഖ്യാപനം. എന്നാല് ശ്രീലങ്കന് പൗരത്വം സംബന്ധിച്ച നിയമ വിഷയങ്ങളില് ഇനിയും ചോദ്യങ്ങള് ബാക്കിയാണ്. പൗരത്വം സംബന്ധിച്ച ചിലവാദങ്ങള് കോടതിയുടെ പരിഗണനയിലാണ്. LTTE യ്ക്ക് എതിരെയുള്ള യുദ്ധത്തില് പ്രധാന പങ്ക് വഹിച്ച വ്യക്...